17 duṣkaracaryāparivartaḥ saptadaśaḥ
Technical Details
17 duṣkaracaryāparivartaḥ saptadaśaḥ|
tena khalu punarbhikṣavaḥ samayena rudrako nāma rāmaputro rājagṛhaṃ nāma mahānagaramupanisṛtya viharati sma mahatā śiṣyagaṇena sārdhaṃ saptabhiḥ śiṣyaśataiḥ| sa tebhyo naivasaṃjñānāsaṃjñāyatanasahavratāyai dharmaṃ deśayati sma| adrākṣīt khalvapi bhikṣavo bodhisattvo rudrakaṃ rāmaputraṃ saṃghegaṇinaṃ gaṇācāryaṃ jñātamabhīpsitaṃ bahujanapūjitaṃ paṇḍitasaṃmatam| dṛṣṭvā cāsyaitadabhūt-ayaṃ khalvapi rudrako rāmaputraḥ saṃghegaṇī gaṇācāryaḥ jñāto'bhīpsito bahujanapūjitaḥ paṇḍitasaṃmataḥ| sacedahamasyāntikamupasaṃkramya vratatapamārabheyam, naiṣa mamāntike viśiṣṭasaṃjño bhavennāpi pratyakṣajñānena jñāto bhavennāpi saṃskṛtānāṃ sāśravānāṃ sopādānānāṃ dhyānasamādhisamāpattīnāṃ doṣo datto bhavet| yannvahaṃ tathārupamupāyamupasaṃdarśayeyaṃ yenaite ca pratyakṣā bhaveyuḥ| dhyānagocarāṇāṃ ca samāpattyārambaṇānāṃ laukikasamādhīnāmaniḥsaraṇatā darśitā bhavet | yannvahaṃ rudrakasya rāmaputrasya sakāśamupasaṃkramya svasamādhiguṇaviśeṣodbhāvanārthaṃ śiṣyatvamabhyupagamya saṃskṛtasamādhīnāmasāratāmupadarśayeyamiti||
atha khalu bhikṣavo bodhisattva idamarthavaśamadhikṛtya yena rudrako rāmaputrastenopasaṃkrāmat| upasaṃkramya rudrakaṃ rāmaputrametadavocat-kaste mārṣa śāstā, kasya vā dharmaṃ deśitamājānāsi?
ityevamukte rudrako rāmaputro bodhisattvamevamāha-na me mārṣa kaścicchāstā| api tu khalu punaḥ svayameva mayedaṃ samyagadhigatamiti| bodhisattva āha-kiṃ bhavatādhigatam? āha-naivasaṃjñānāsaṃjñāyatanasamāpattermārgaḥ| bodhisattva āha-labhemahi vayaṃ bhavataḥ sakāśādavavādānuśāsanīyasya samādhermārgam? āha-vāḍhamastviti| yāvaddatto'vavādo'bhūt||
tato bodhisattva ekāntaṃ gatvā paryaṅkamābhujyopaviśati sma| samanantaropaviṣṭasya ca bodhisattvasya puṇyaviśeṣeṇa ca jñānaviśeṣeṇa ca pūrvasucaritacaryāphalaviśeṣeṇa ca sarvasamādhiparicayaviśeṣeṇa ca dhyānapramukhāni sarvāṇi laukikāni lokottarāṇi samāpattiśatānyāmukhībhavanti sma sākārāṇi soddeśāni yathāpi taccittavaśavartitvāt| atha ca bodhisattvaḥ smṛtaḥ saṃprajānan utthāyāsanādyena rudrako rāmaputrastenopasaṃkrāmat| upasaṃkramya rudrakaṃ rāmaputramevamāha astyanyo'pi mārṣa kaściduttare naivasaṃjñānāsaṃjñāyatanasamāpattermārgaḥ? so'bravīt-nāstīti||
tato bodhisattvasyaitadabhavat-na khalu rudrakasyaivāsti śraddhā vīryaṃ smṛtiḥ prajñā| mamāpyasti śraddhā vīryaṃ smṛtiḥ samādhiḥ prajñā|
atha bodhisattvo rudrakaṃ rāmaputramevamāha-mayāpyeṣa mārṣa dharmo'dhigato yatra tvaṃ niryātaḥ| so'vocat-tena hyāgaccha, tvaṃ cāhaṃ cemaṃ gaṇaṃ pariharāva iti| samānārthe ca bodhisattvaṃ sthāpayati sma ācāryasthāne ca| bodhisattva āha-naiṣa mārṣa mārgo nirvṛtaye na virāgāya na nirodhāya nopaśamāya nābhijñāyai na saṃbodhaye na śrāmaṇāya na brāhmaṇāya na nirvāṇāya saṃvartate||
iti hi bhikṣavo bodhisattvo rudrakasya rāmaputrasya saśiṣyasyāvarjanīkṛtva yāvadalamiti kṛtvā prakrāmat-alaṃ mamāneneti||
tena khalu punaḥ samayena pañcakā bhadravargīyā rudrake rāmaputre brahmacaryaṃ caranti sma| teṣāmetadabhūt-yasya khalu vayamarthāya dīrgharātraṃ ghaṭāmahe udyujyāmahe, na ca śaknumo'ntaṃ vā paryantaṃ cādhigantum, tacchramaṇena gautamenālpakakṛcchaṇādhigantuṃ sākṣātkṛtam| taccāsya na rocate| tathā cottari paryeṣate| niḥsaṃśayameṣa śāstā loke bhaviṣyati| yaccaiṣa sākṣātkariṣyati, tadasmabhyaṃ saṃvibhakṣyatīti| evaṃ vimṛṣya pañcakā bhadravargīyā rudrakarāmaputrasakāśādapakramya bodhisattvamanvabadhnan||
iti hi bhikṣavo bodhisattvo yathābhipretaṃ rājagṛhe vihṛtya magadheṣu cārikāṃ prakrāmat sārdhaṃ pañcakairbhadravargīyaiḥ||
tena khalu punaḥ samayenāntarācca rājagṛhasya antarācca gayāyā yo'nyatamo gaṇa utsavaṃ karoti sma, tena ca gaṇena bodhisattvo'bhinimantrito'bhūt vāsena bhaktena ca sārdhaṃ pañcakairbhadravargīyaiḥ||
atha khalu bhikṣavo bodhisattvo magadheṣu caryāṃ caran yena māgadhakānāṃ gayā tāmanusṛtya tāmanuprāpto'bhūt| tatra khalvapi bhikṣavo bodhisattvaḥ prahāṇārthī viharati sma gayāśīrṣe parvate| tatrāsya viharatastisra upamāḥ pratibhānti sma aśrutapūrvā anabhijñātapūrvāḥ| katamāstisraḥ? ye kecitte khalvapi śramaṇabrāhmaṇāḥ kāmebhyo'navakṛṣṭakāyā viharanti sma| kāmebhyo'navakṛṣṭacittāśca viharanti sma| yāpi caiṣāṃ kāmeṣu nandiḥ kāmeṣu rāgaḥ kāmeṣu chandaḥ kāmeṣu tṛṣṇā kāmeṣu pipāsā kāmeṣu mūrchā kāmeṣu paridāhaḥ kāmeṣvadhyavasānatā, sāpyanupaśāntā| kiṃ cāpi te ātmopakramikāṃ śarīropatāpikāṃ duḥkhāṃ tīvrāṃ kharāṃ kaṭukāmamanāpāṃ vedanāṃ vedayante| atha tarhi abhavyā eva te uttarimanuṣyadharmādalamāryajñānadarśanaviśeṣaṃ sākṣātkartum| tadyathāpi nāma puruṣo'gnyarthī jyotirgaveṣī jyotiṃ paryeṣamāṇaḥ sa ārdraṃ kāṣṭhamādāya ārdrāṃ cottarāraṇīmudake prakṣipya mathnīyāt, abhavyo'sāvagnimutpādayituṃ tejaḥ prāduṣkartum| evameva ya ime śramaṇabrāhmaṇāḥ kāmebhyo'navakṛṣṭakāyā anavakṛṣṭacittāśca viharanti, yāpyeṣāṃ kāmeṣu nandiḥ kāmeṣu rāgaḥ kāmeṣu chandaḥ kāmeṣu tṛṣṇā kāmeṣu pipāsā kāmeṣu mūrchā kāmeṣu paridāhaḥ kāmeṣvadhyavasānaṃ tadapyanupaśāntam| kiṃ cāpi te ātmopakramikāṃ śarīropatāpikāṃ duḥkhāṃ tīvrāṃ kharāṃ kaṭukāṃ vedanāṃ vedayante| atha tarhi abhavyā evottarimanuṣyadharmādalamāryajñānadarśanaviśeṣaṃ sākṣātkartum| iyaṃ bodhisattvasya prathamā upamā pratibhāti sma||
bhūyaścāsyaitadabhūt-ya ime śramaṇabrāhmaṇāḥ kāmebhyo vyapakṛṣṭakāyacittā viharanti, yāpi teṣāṃ kāmeṣu nandīti sarvaṃ kartavyaṃ yāvajjyotiṃ paryeṣata iti| sa ārdraṃ kāṣṭhamādāya sthale sthāpayitvā ārdrāṃ cottarāraṇiṃ mathnīyāt, abhavyo'sāvagnimutpādayitum| evameva ye ime śramaṇabrāhmaṇā iti sarvaṃ pūrvavatkāryaṃ yāvadabhavyā uttarimanuṣyadharmādalamāryajñānadarśanaviśeṣaṃ sākṣātkartum| iyaṃ dvitīyā upamā pratibhāti sma pūrvamaśrutā cāvijñātā ca||
punaraparaṃ ya ime śramaṇabrāhmaṇā bhavantaḥ kāmebhyo vyapakṛṣṭakāyacittā viharanti, yāpi teṣāṃ kāmeṣu nandiḥ| iti sarvaṃ peyālam| tadapyeṣāmupaśāntam| kiṃ cāpi te ātmopakramikāṃ śarīropatāpikāṃ duḥkhāṃ tīvrāṃ kharāṃ kaṭukāṃ vedanāṃ vedayante| atha khalu punarbhavyā eva te uttarimanuṣyadharmādalamāryajñānadarśanaviśeṣaṃ sākṣātkartum| tadyathāpi nāma iha syātpuruṣo'gnyarthī jyotirgaveṣī jyotiḥ paryeṣamāṇaḥ, sa śuṣkaṃ kāṣṭhamādāya śuṣkāṃ cottarāraṇiṃ sthale pratiṣṭhāpya mathnīyāt, sa bhavyo'gnimabhinirvartayituṃ tejaḥ prāduṣkartum| evameva ya ime bhavantaḥ śramaṇabrāhmaṇā iti sarvaṃ yāvadvedanāṃ vedayanta iti| atha ca punarbhavyā eva te uttarimanuṣyadharmādalamāryajñānadarśanaviśeṣaṃ sākṣātkartum| iyaṃ tṛtīyā upamā pratibhāti sma aśrutapūrvā ca avijñātapūrvā ca||
atha khalu bhikṣavo bodhisattvasyaitadabhūt-ahaṃ khalvetarhi kāmebhyo vyapakṛṣṭakāyo viharāmi vyapakṛṣṭacittaśca| yāpi me kāmeṣu nandīti sarvaṃ yāvattadapi me upaśāntam| kiṃ cāpi ahamātmopakramikāṃ śarīropatāpikāṃ duḥkhāmiti peyālaṃ yāvadvedanāṃ vedmi| atha khalvahaṃ bhavya evottarimanuṣyadharmādalamāryajñānadarśanaviśeṣaṃ sākṣātkartum||
iti hi bhikṣavo bodhisattvo yathābhipretaṃ gayāyāṃ vihṛtya gayāśīrṣe parvate jaṅgāvihāramanucaṃkramyamāṇo yenorubilvā senāpatigrāmakastadanusṛtastadanuprāpto'bhūt| tatrādrākṣīnnadīṃ nairañjanāmacchodakāṃ sūpatīrthāṃ prāsādikaiśca drumagulmairalaṃkṛtāṃ samantataśca gocaragrāmām| tatra khalvapi bodhisattvasya mano'tīva prasannamabhūt-samo batāyaṃ bhūmipradeśo ramaṇīyaḥ pratisaṃlayanānurūpaḥ| paryāptamidaṃ prahāṇārthikakulaputrasya| ahaṃ ca prahāṇārthī| yannvahamihaiva tiṣṭheyam||
iti hi bhikṣavo bodhisattvasyaitadabhut-pañcakaṣāyakāle'hamiha jambudvīpe'vatīrṇo hīnādhimuktikeṣu sattveṣvākīrṇatīrthyavargeṣu nānādṛṣṭipraskanneṣu kāyapiṇḍagrāhābhiniviṣṭeṣu nānāvidhaiścātāpanaparitāpanaiḥ kāyaśuddhiṃ paryeṣante, prajñāpayanti ca saṃmūḍhāḥ| tadyathā- mantravicārakairhastapralehakairnayācanakairanāmantraṇakairanekamūlikairamatsyamāṃsakairavārṣikaiḥ surātuṣodakarvajanairekatripañcasaptakulabhikṣāgrahaṇairmūlaphalaśaivālakakuśapatragomayagomūtrapāyasadadhisarpiḥ phāṇitāmapiṣṭakamabhakṣaṇapānaiḥ sārasikāpotakasaṃdaṃśikotsṛṣṭasaṃprakṣālakaiḥ| grāmyāraṇyābhiśca vṛttibhiḥ| govratamṛgaśvavarāhavānarahastivrataiśca sthānamaunavīrāsanaiśca ekālāpakairyāvatsaptālāpakaiḥ| ekabhaktā ekāhorātracāturthyapañcaṣaṭkālāntarāśca pakṣakṣapaṇamāsakṣapaṇacāndrāyaṇaiśca gṛdhrolūkapakṣadhāraṇaiśca phalamuñjāsanavalkaladarbhabalbajoṣṭrakambalājakambalakeśakambalacarmaniveśanaiśca ārdrapaṭāstopakajālaśayanaiśca bhasmaśarkarāpāṣāṇaphalakakaṇṭakatṛṇamusalaśayanāvākchirotkuṭukasthaṇḍilaśayanaiśca ekavāsadvitricatuṣpañcaṣaṭsaptabahuvāsobhirnagnabhāvaiśca sthānāsthānavidhibhiśca dīrghakeśanakhaśmaśrujaṭāmakuṭadhāraṇaiśca ekakolatilataṇḍulāhāraiśca bhasmamasinirmālyoddhṛtatamorajapāṃśupaṅkaparimrakṣaṇaiśca lomamuñjakeśanakhacīvarapañjarakaraṅkadhāraṇaiśca uṣṇodakataṇḍulodakaparisrāvitakāmbalikasthālīpānīyapānaiśca aṅgāradhātukaṣāyatridaṇḍamuṇḍikakuṇḍikakapālakhaṭvāṅgadhāraṇaiśca śuddhiṃ pratyavagacchanti saṃmūḍhāḥ| dhūmapānāgnipānādityanirīkṣaṇapañcatapaikapādordhvabāhusthānaikacaraṇaiśca tapaḥ saṃcinvanti| tuṣādyaṅgāradāhanikumbhasādhanapakvaśilāpacanāgnijalapraveśanamarutīrthagamanamaraṇaiśceṣṭāṃ gatiṃ mṛgayante| oṃkāravaṣaṭkārasvadhākārasvāhākārāśīrvacanastuticayanāvāhanajapyamantrādhyayanadhāraṇakaraṇaiśca śuddhiṃ pratyavagacchanti| śuddhaṃ cātmānaṃ manyamānā imānāśrayante| tadyathā-brahmendrarudraviṣṇudevīkumāramātṛkātyāyanīcandrādityavaiśravaṇavaruṇavāsavāśvinaunāgayakṣa-gandharvāsuragaruḍakinnaramahoragarākṣasapretabhūtakumbhāṇḍapārṣadagaṇapatipiśācāṃśca devarṣirājarṣibrahmarṣīśca namasyanti, teṣu ca sārasaṃjñino bhavanti| pṛthivyaptejovāyvākāśaṃ cāśrayante| girīnadīnadyutsasarohradataḍāgasāgarasaraḥpalvalapuṣkariṇīkūpavṛkṣagulmalatātṛṇasthāṇugoṣṭhaśmaśāna-catvaraśṛṅgāṭakāntarāpaṇamukhāni cāśrayante| gṛhastambhopalamusalāsidhanuparaśuśaraśaktitriśūlāṃśca namasyanti| dadhighṛtasarṣapayavapratisarādūrvāmaṇikanakarajatādibhiśca maṅgalaṃ pratyavagacchanti| evaṃvidhāni ime tīrthyāḥ kurvante, āśrayante ca saṃsārabhayabhītāḥ||
iha ca kecitparatra manyante svargāpavargāvasmākametebhyo nirvartsyeta iti mithyāmārgaprayātā aśaraṇe śaraṇasaṃjñino'maṅgalye maṅgalasaṃjñino'śuddhyā śuddhiṃ manyatoyannvahaṃ tādṛśaṃ vratatapoviśeṣamālabheyaṃ yathā sarvaparapravādinaśca nigṛhītāḥ syuḥ, karmakriyāpraṇaṣṭānāṃ ca sattvānāṃ karmakriyāvipraṇāśamādarśayeyam| dhyānagocarāṇāṃ ca rūpāvacarāṇāṃ ca devānāṃ dhyānaviśeṣopadarśanādāvarjanaṃ kuryāmiti||
iti hi bhikṣavo bodhisattva evaṃ cintayitvā ṣaḍvarṣikaṃ mahāghoraṃ vratatapaḥsuduṣkarātsuduṣkarāṃ duṣkaracaryāmālabhate sma| kena kāraṇenocyate duṣkaracaryeti? duṣkarakārikaiṣā, tenocyate duṣkaracaryeti| na sa kaścitsattvaḥ sattvanikāye saṃvidyate manuṣyo vā amanuṣyo vā, yaḥ samarthastathārūpaṃ duṣkaraṃ caritum, anyatra caramabhavikādbodhisattvāt, ya āsphānakadhyānaṃ samāpadyate sma| kena kāraṇenocyate āsphānakamiti? sa caturthadhyānamādita eva samāpadyamāna āśvāsapraśvāsānuparodhayati saṃnirodhayati| akalpaṃ tad dhyānamavikalpamaniñjanamapanītamaspandanaṃ sarvatrānugataṃ ca sarvatra cāniśritam| na ca tad dhyānaṃ jātu kenacitsamāpannaṃ pūrvaṃ śaiṣyeṇa vā aśaiṣyeṇa vā pratyekabuddhena vā caryāpratipannena vā bodhisattvena| ataścāsphānakaṃ nāmocyate | ākāśamaspharaṇamakaraṇamavikaraṇaṃ tacca sarvaṃ spharatīti hyākāśasamaṃ tad dhyānam| tenocyate āsphānakamiti||
atha khalu bhikṣavo bodhisattvo lokasyāścaryasaṃdarśanārthaṃ tīrthikānāṃ ca darpanirghātanārthaṃ parapravādināṃ ca nigrahārthaṃ devānāṃ cāvarjanārthamucchedaśāśvatavādināṃ ca sattvānāṃ krarmakriyāpraṇaṣṭānāṃ karmakriyāvatāraṇārthaṃ puṇyaphalodbhāvanārthaṃ jñānaphalasaṃdarśanārthaṃ dhyānāṅgavibhajanārtha kāyabalasthāmasaṃdarśanārthaṃ cittaśauryasaṃjananārthaṃ ca asaṃskṛtāyāṃ pṛthivyāṃ paryaṅkamābhujya niṣīdati sma| niṣadya ca svakāyaṃ cetasā nigṛhṇīte sma, niṣpīḍayati sma||
tato me bhikṣavo haimantikāsvaṣṭakarātriṣu tathā kāyaṃ nigṛhṇato niṣpīḍayataḥ kakṣābhyāmapi svedāḥ praśravanti sma| lalāṭādapi svedāḥ praśravanti sma| bhūmau nipatanti sma avaśyāyanta ūṣmāyanto bāṣpāyantaḥ| tadyathāpi nāma balavān puruṣo durbalataraṃ puruṣaṃ grīvāyāṃ gṛhītvā niṣpīḍayet, evameva bhikṣava imaṃ kāyaṃ cetasā nigṛhṇato niṣpīḍayataḥ kakṣābhyāmapi svedāḥ praśravanti sma| lalāṭādapi svedāḥ praśravanti sma| bhūbhau nipatanti sma avaśyāyanta ūṣmāyanto bāṣpāyantaḥ||
tasya me bhikṣava etadabhūt-yannvahamāsphānakaṃ dhyānaṃ dhyāyeyam| tato me bhikṣava āsphānakaṃ dhyānaṃ dhyāyato mukhato nāsikātaścāśvāsapraśvāsā upaniruddhāvabhūtām| karṇachidrābhyāmuccaśabdā mahāśabdā niścaranti sma| tadyathāpi nāma karmāragagayā mathyamānāyāmuccaśabdo mahāśabdo niścarati, evameva me bhikṣavo mukhanāsikābhyāmāśvāsapraśvāsāvuparuddhāvabhūtāṃ śrotachidrābhyāmuccaśabdo mahāśabdo niścarati sma||
tasya me bhikṣava etadabhūt-yannvahaṃ bhūya āsphānakaṃ dhyānaṃ dhyāyeyamiti| tato me bhikṣavo mukhanāsikāśrotrāṇyuparuddhāni cābhūvan| teṣūparuddheṣu vāyururdhvaṃ śiraḥkapālamupanihanti sma| tadyathāpi nāma bhikṣavaḥ puruṣaḥ kuṇḍayā śaktyā śiraḥkapālamupahanyād, evameva me bhikṣavo mukhanāsikāśrotreṣūparuddheṣu āśvāsapraśvāsā urdhvaṃ śiraḥkapālamupanighnanti sma||
tāṃ cāvasthāṃ dṛṣṭvā bodhisattvasya tatra keciddevā evamāhu-kaṣṭaṃ bhoḥ kālagato batāyaṃ siddhārthaḥ kumāraḥ| apare evamāhuḥ-nāyaṃ kālagataḥ| api tudhyānavihāra eṣo'rhatāmevaṃvidha iti| tasyāṃ ca velāyamimāṃ gāthāmabhāṣanta—
mā khalvayaṃ śākyanarendragarbho
hyapūrṇasaṃkalpa ihaiva raṇye|
kṛtvā trilokaṃ dukhitaṃ hyanāthaṃ
kālaṃ kariṣyatyakṛtārtha eva||1||
hā sattvasārā sadṛḍhapratijñā
saddharmayajñena nimantritābhūt|
vayaṃ purā te tuṣiteṣu nāthā
kva sā pratijñā tava śuddhasattva||2||
atha te devaputrāstrāyatriṃśeṣu deveṣu gatvā māyādevyā evamarthaṃ śrāvayanti-kālagataḥ kumāraḥ| atha māyādevī apsarāgaṇaparivṛtā ardharātrasamaye nairañjanāyāstīre yena bodhisattvastenopasaṃkrāntā| sā paśyati sma bodhisattvaṃ śuṣkagātram| kālagatamiva dṛṣṭvā bāṣpagadgadakaṇṭhā roditumārabdhā| tasyāṃ ca velāyāmimāṃ gāthāmabhāṣata—
yadā jāto'si me putra vane lumbinisāhvaye|
siṃhavaccāgṛhītastvaṃ prakrāntaḥ sapta padā svayam||3||
diśāṃ cālokya cature vācā te pravyāhṛtā śubhā|
iyaṃ me paścimā jātiḥ sā te na paripūritā||4||
asitenābhinirdiṣṭo buddho loke bhaviṣyasi|
kṣuṇṇaṃ vyākaraṇaṃ tasya na dṛṣṭā tena nityatā||5||
cakravartiśriyaṃ putra napi bhuktā manoramā|
na ca bodhimanuprāpto yāto'si nidhanaṃ vane||6||
putrārthe kaṃ prapadyāmi kaṃ va krandāmi duḥkhitā|
ko me dadyekaputrasya kiṃcitprāṇasya jīvitam||7||
bodhisattva āha—
kaiṣā ati tvāṃ karuṇaṃ rudāsi
prakīrṇakeśā vinivṛttaśobhā|
putraṃ hyatīvā paridevayantī
viceṣṭamānā dharaṇītalasthā||8||
māyādevī āha—
mayā tu daśamāsāṃ vai kukṣau vajra ivā dhṛtaḥ|
sā te'haṃ putrakā mātā vilapāmi suduḥkhitā||9||
atha bodhisattva āśvāsayannuvāca-na bhetavyaṃ putralālase, śramaṃ te saphalaṃ kariṣyasi| amoghaṃ buddhaparityāgam| asitanirdeśaṃ ca vyaktaṃ kariṣyāmi| dīpaṃkarasya vyākaraṇaṃ vyaktīkariṣyāmi ca|
api śatadhā vasudhā vikīryeta
meruḥ plave cāmbhasi ratnaśṛṅgaḥ|
candrārkatārāgaṇa bhū pateta
pṛthajano naiva ahaṃ mriyeyam|
yasmānna śoko tvayi atra kāryo
na vai cirād drakṣyasi buddhabodhim||10||
sahaśravaṇādeva devī māyā saṃpraharṣitaromakūpajātā bodhisattvaṃ māndāravapuṣpairabhyavakirya tripradakṣiṇīkṛtvā divyatūryaiḥ saṃpravādyamānairyena svabhavanaṃ tenopajagāma||
tasya me bhikṣava etadabhūt-santyeke śramaṇabrāhmaṇā ye alpāhāratayā śuddhiṃ manyante| yannvahamalpāhāratayā pratipadyeyamiti| abhijānāmyahaṃ bhikṣava ekamevādvitīyaṃ kolamāhāramāhartum| syātkhalu punarbhikṣavo yuṣmākaṃ eṣā buddhiḥ-mahattaraṃ tatra kāle kolamāsīditi| na khalvevaṃ draṣṭavyam| atha khalviyadeva tatra kāle kolamabhūt| tasya me bhikṣava ekameva kolamāhāramāharato'dvitīyaṃ kāyo'tyarthaṃ karśito'bhūddurbalaḥ| tadyathāpi nāma bhikṣava āsītakīparvāṇi vā kālāparvāṇi vā, evameva me'ṅgapratyaṅgānyabhūvan| tadyathāpi nāma karkaṭapārśukā, evameva me pārśukā abhūvan| tadyathāpi nāma vāhanakāraśālāyāṃ vā hastiśālāyāṃ vā jīrṇāyāmubhayato vivṛtāyāṃ gopānasyāntarikāśca virājante vyavabhāsante, evameva me pārśukā antaḥkāye ubhayato virājante sma vyavabhāsante sma| tadyathāpi nāma vartanyā veṇī unnatāvanatā bhavati samaviṣamā, evaṃ me pṛṣṭhīkaṇṭako'bhūdunnatāvanataḥ samaviṣamaḥ| tadyathā tiktakālābustaruṇo lūna āmlāno bhavati saṃmlānaḥ samutpuṭakajātaḥ evameva śira āmlānamabhūtsaṃmlānaṃ samutpuṭakajātam| tadyathāpi nāma grīṣmāṇāṃ paścime māse kūpatārakā dūragatā bhavanti, kṛcchreṇa saṃprakāśyante, evameva me'kṣitārakau duragatāvabhūtāṃ kṛcchreṇa saṃprakāśyete sma| tadyathāpi nāmājapadaṃ voṣṭrapadaṃ vā, evameva me kakṣākukṣivakṣādīnyabhūvan| tato yadāhaṃ bhikṣavaḥ pāṇinā kukṣiṃ spṛśāmīti pṛṣṭhikaṇṭakamevāsprākṣam| uttiṣṭhāmīti cābhisaṃskurvaṃstathaivāvakubjaḥ prayāmeṇa prāpatam| tataḥ kṛcchreṇotthito'pi pāṃśukṛtāni gātrāṇi pāṇinā pramṛjato me pūtiromāṇi kāyācchīryante sma| yāpi me'bhūtpaurāṇī śubhavarṇatanuḥ sāpyantaradhādyathāpīdaṃ rūkṣapradhānaṃ prahitātmanaḥ| sāmantāśca me gocaragrāmavāsina evaṃ saṃjānante sma-kālako bata bhoḥ śramaṇo gautamaḥ| śyāmako bata bhoḥ śramaṇo gautamaḥ| madguracchavirbata bhoḥ śramaṇo gautamaḥ| yāpyasyābhūtpaurāṇī śubhavarṇā nibhā, sāpyantarhitā||
tasya me bhikṣava etadabhūt-yannvahaṃ bhūyasyā mātrayālpāhāratayā pratipadyeyamiti| abhijānāmyahaṃ bhikṣava ekameva taṇḍulamadvitīyamāhāramāhartum| syādbhikṣavo yuṣmākamevaṃ mahattaraṃ taṇḍulaṃ tasmin kāle'bhūditi| na khalvevaṃ draṣṭavyam| athaitāvāneva tasmin kāle taṇḍulo'bhūt| tasya me bhikṣava ekaṃ taṇḍulamāharataḥ kṣipraṃ kāyo'bhūditi pūrvavadyāvanmadguracchavirbata bhoḥ śramaṇo gautama iti| yāpyasya sābhūtpaurāṇī śubhavarṇatanuḥ sāpyantarhiteti||
tasya me bhikṣava etadabhūt-yannvahaṃ bhūyasyā mātrayālpāhāratāyai pratipadyeyamiti| abhijānāmyahaṃ bhikṣava ekameva tilamadvitīyamāhāramāhārayitum| peyālaṃ| yāvatsāpyasya śubhavarṇatanurantarhiteti||
tasya me bhikṣava etadabhut-santyeke śramaṇabrāhmaṇā ye'nāhāratayā śuddhiṃ manyante| yannvahaṃ sarveṇa sarvamanāhāratāyai pratipadyeyamiti| tato'haṃ bhikṣavo'nāhārasthito'bhūvan| tasya me bhikṣavo'nāhārasya kāyo'tīva śuṣko'bhūt kṛśo durbalaḥ, tadyathāpi nāma āsitakīparvāṇi vā kālāparvāṇi vā| tato dviguṇatriguṇacaturguṇapañcaguṇadaśaguṇaṃ me kṛśānyaṅgapratyaṅgānyabhūvan| tadyathā karkaṭakapārśukā vāhanaśālāyāṃ vā gopānasī (pārśve) dviparivartanā veṇīvatpṛṣṭhīkaṇṭakaḥ| tiktālābuvacchiraḥkapālam, kūpatārakā ivākṣitārake| so'haṃ bhikṣavaḥ sādhukamuttiṣṭhāmīti gātrāṇyabhisaṃskurvannavakubjaḥ prāpatam| kṛcchreṇāpi cotthitaḥ pāṃśukṛtāni me gātrāṇi pramṛjataḥ pūtimūlāni romāṇyaśīryanta| yāpi me sābhūcchubhavarṇatanunibhā, sāpyantaradhāt| tadyathāpi tadrūkṣapradhānaprahitātmakatvāt| sāmantāśca me gocaragrāmavāsino janā evaṃ saṃjānante sma-kālako bata bhoḥ śramaṇo gautamaḥ| śyāmako bata bhoḥ śramaṇo gautamaḥ| madguracchavirbata bhoḥ śramaṇo gautamaḥ| yāpyasya sābhūtpaurāṇī śubhavarṇanibhā sāpyantarhiteti||
rājāpi tadā śuddhodanaḥ pratipratidivasaṃ bodhisattvasyāntike dūtaṃ preṣayati sma||
iti hi bhikṣavo bodhisattvo lokasyādbhutakriyāsaṃdarśanārthaṃ pūrvavadyāvatkarmakriyāpraṇaṣṭānāṃ sattvānāṃ karmakriyāvatāraṇārthaṃ puṇyasaṃcayānāṃ codbhāvanārthaṃ mahājñānasya ca guṇasaṃdarśanārthaṃ dhyānāṅgānāṃ ca vibhajanārthamekatilakolataṇḍulena ṣaḍvarṣāṇi duṣkaracaryāmanuvartayantamupadarśayati sma| adīnamānasaḥ ṣaḍvarṣā bodhisattvo yathā niṣaṇṇa evāsthāt paryaṅkena| na ca īryāpathāccyavate sma| nātapācchāyāmagamanna chāyāyā ātapam| na ca vātātapavṛṣṭiparitrāṇamakaronna ca daṃśamaśakasarīsṛpānapanayati sma| na coccārapraśrāvaśleṣmasiṃhāṇakānutsṛjati sma| na ca samiñjanaprasāraṇamakarot| na ca pārśvodarapṛṣṭhasthānenāsthāt| ye'pi ca te mahāmeghā durdinavarṣāśaniśaradgrīṣmahaimantikāḥ, te'pi bodhisattvasya kāye nipatanti sma| na cāntato bodhisattvaḥ pāṇināpi pracchādanamakarot| na cendriyāṇi pithayati sma| na cendriyārthān gṛhṇite sma| ye ca tatrāgaman grāmakumārakā vā grāmakumārikā vā gopālakā vā paśupālakā vā tṛṇahārikā vā kāṣṭhahārikā vā gomayahārikā vā, te bodhisattvaṃ pāṃśupiśācamiti manyante sma| tena ca krīḍanti sma| pāṃśubhiścainaṃ mrakṣayanti sma||
tatra bodhisattvastaiḥ ṣaḍbhirvarṣaistāvallūhanyūnadurbalakāyaḥ saṃvṛtto'bhūt, yadasya karṇaśrotābhyāṃ tṛṇatūlakaṃ prakṣipya nāsāśrotābhyāṃ niṣkāsyate sma| nāsāśrotābhyāṃ prakṣipya karṇaśrotābhyāṃ niṣkāsyate sma| karṇaśrotābhyāṃ prakṣipya mukhadvāreṇa niṣkāsyate sma| mukhadvāreṇa prakṣipya karṇanāsikāśrotābhyo niṣkāsyate sma| nāsāyāṃ prakṣipya karṇanāsikāmukhadvāreṇa niṣkāsyate sma||
ye ca te devanāgayakṣagandharvāsuragaruḍakinnaramahoragā manuṣyāmanuṣyā bodhisattvasya guṇeṣu pratyakṣāḥ, te rātriṃdivaṃ samadhiṣṭhā bodhisattvasya pūjāṃ kurvanti sma| praṇidhānāni ca kurvanti sma||
tatra bodhisattvena tai ṣaḍbhirvarṣairduṣkaracaryāṃ saṃdarśayatā paripūrṇāni dvādaśanayutāni devamanuṣyāṇāṃ tribhiryānaiḥ paripācitānyabhūvan||
tatredamucyate—
tasya ca guṇānvitasya purādviniṣkramya bodhisattvasya|
cintā upāyayuktā sattvārthahitāya utpannā||11||
pañcasu kaṣāyakāle hīne'dharmādhimuktike loke|
jāto'smi jambudvipe dharmakriyauddhure loke||12||
ākīrṇa tīrthikagaṇaiḥ kautūhalamaṅgalairime yuktā|
kāyopakramakaraṇairmanyante bāliśāḥ śuddhim||13||
agnipraveśamaruprapātapāṃśubhasmādimakṣitā nagnāḥ|
kāyaparitāpanārthaṃ pañcātapayogamanuyuktāḥ||14||
mantrāvicārakaraṇā keciddhastāvalehakā abudhāḥ|
na ca kumbhamukhakaroṭānna dhārakuśalāntarācca gṛhṇanti||15||
na ca yatra svānubhavatī na cāhitaṃ tena tiṣṭhavākyasya|
kulabhikṣa eka gṛhyā śuddhaṃ manyantihātmānam||16||
varjenti sarpitailaṃ phāṇitadadhidugdhamatsyamāṃsāni|
śyāmākaśākabhakṣā mṛṇālagarḍulakaṇābhakṣāḥ||17||
mūlaphalapatrabhakṣāḥ kuśacīvaracarmakambaladharāśca|
apare bhramanti nagnāḥ satyamidaṃ mohamanyaditi mūḍhāḥ||18||
dhārenti ūrdhvahastā urdhvaṃkeśā jaṭāśca dhārenti|
mārgānatipranaṣṭā amārgasaṃsthāḥ sugatigamanakāmāḥ||19||
tṛṇamusalabhasmaśayanāḥ kaṇṭakaśayanāśca utkuṭadhyāyi|
sthita kecidekapāde ūrdhvamukhāścandrasūrya paśyantaḥ||20||
utsāṃ sarasataḍāgāṃ sāgarasaritaśca candrasūryau ca|
vṛkṣagiriśailaśikharāṃ kumbhaṃ dharaṇīṃ namasyante||21||
vividhaiśca kāraṇaiste kāyaṃ pariśodhayanti saṃmūḍhāḥ|
mithyādṛṣṭiparītāḥ kṣipraṃ prapatantyapāyeṣu||22||
yannūnamahaṃ vratatapa duṣkaracaryāṃ samārabhe ghorām|
yaṃ duṣkaraṃ na śakyaṃ carituṃ devairmanuṣyairvā||23||
āsphānakaṃ ca dhyānaṃ dhyāyeyaṃ vajrakalpadṛḍhasthānam|
yaṃ dhyānaṃ na samarthāḥ pratyekajināpi darśayitum||24||
santīha devamanujāḥ tīrthika lūhavratena hṛṣyante|
teṣa paripākaheto duṣkaravratatapa rabheya sūtīvram||25||
paryaṅkamābhujitvā upaviṣṭo'bhūtsthale asaṃstīrṇe|
kolatilataṇḍulenā āhāravidhiṃ vidarśayati||26||
āśvāsaviprahīnaḥ praśvāsavarjitu na ceñjate bālavān|
ṣaḍvarṣāṇi pravaraṃ dhyāyatyāsphānakaṃ dhyānam||27||
kalpaṃ no na vikalpaṃ na ceñjanaṃ nāpimanyena pracāram|
ākāśadhātuspharaṇaṃ dhyāyatyāsphānakaṃ dhyānam||28||
na ca ātapātu chāyāṃ chāyāyā nātapaṃ gataścāsau|
meruriva niṣprakampyo dhyāyatyāsphānakaṃ dhyānam||29||
na ca vātavṛṣṭichadanaṃ na daṃśamaśakāsarīsṛpātrāṇam|
avikopitayā caryā dhyāyatyāsphānakaṃ dhyānam||30||
na ca kevalamātmārthaṃ dhyāyatyāsphānakaṃ dhyānam|
anyatra karuṇacitto bhāvī lokasya vipulārtham||31||
ye grāmadārakāśca gopālāḥ kāṣṭhahāratṛṇahārāḥ|
pāṃśupiśācakamiti taṃ manyante pāṃśunā ca mrakṣanti||32||
aśucīnā ca kirante vividhāste kāraṇāśca kārenti|
na ca iñjate bhramati vā dhyāyatyāsphānakaṃ dhyānam||33||
na ca namati no vinamate na kāyaparirakṣaṇā spṛśati|
kiṃcinnoccāraprasravaṃ śabdeṣu na saṃtrasī na paraprekṣī||34||
saṃśuṣkamāṃsarudhiraṃ carmasnāyvasthikāśca avaśiṣṭā|
udarācca pṛṣṭhivaṃśo vidṛśyate vartitā yathā veṇī||35||
ye te kṛtādhikārā devāḥ suranāgayakṣagandharvāḥ|
pratyakṣaguṇadharasyā karonti pūjāṃ divārātrau||36||
praṇidhiṃ ca kurvate te vayamapi tādṛśa bhavāmahe kṣipram|
yatha eṣa gaganacitto dhyāyatyāsphānakaṃ dhyānam||37||
na ca kevalamātmārthaṃ na dhyānasvādanānna sukhabuddhyā|
anyatra karuṇabuddhyā kariṣyatyarthaṃ vipula loke||38||
nihatāḥ parapravādā dhyāmīkṛta tīrthikā mativihīnāḥ|
karmakriyā ca darśita yā proktā kāśyape vācā||39||
krakucchandakasya bodhi bodhiriha sudurlabhā bahubhi kalpaiḥ|
janatāyā ityarthaṃ dhyāyatyāsphānakaṃ dhyānam||40||
dvādaśanayutā pūrṇā vinīta marumānuṣāstribhiryānaiḥ|
etadadhikṛtya sumati dhyāyatyāsphānakaṃ dhyānam||41||
|| iti śrīlalitavistare duṣkaracaryāparivarto nāma saptadaśamo'dhyāyaḥ||